Пошук

Метадычны дапаможнік, у якім сем'і вернікаў аднесены да небяспечных, не адлюстроўвае пазіцыю Міністэрства адукацыі

16 верасня 2017

У беларускіх СМІ была апублікаваная інфармацыя аб тым, што Міністэрства адукацыі распрацавала метадычны дапаможнік «Праца з дзецьмі, якія маюць патрэбу ў сацыяльна-псіхолага-педагагічнай падтрымцы». Згодна з гэтым дакументам, да катэгорыі няўдалых сем'яў, якія патрабуюць павышанай увагі, аднесены шматдзетныя, няпоўныя, малазабяспечаныя, замяшчальныя сем'і, сем'і з дзецьмі-інвалідамі, сем'і перасяленцаў, бежанцаў, эмігрантаў, студэнтаў і сем'і вернікаў.

Фармулёўкі гэтага дакумента выклікалі вельмі негатыўную рэакцыю беларускага грамадства.

Сінадальны аддзел па рэлігійнай адукацыі і катэхізацыі Беларускай Праваслаўнай Царквы звярнуўся за афіцыйнымі тлумачэннямі ў Міністэрства адукацыі Рэспублікі Беларусь. 11 верасня 2017 года была праведзена афіцыйная сустрэча з намеснікам Міністра адукацыі Раісай Станіславаўнай Сідарэнка, якая праінфармавала аб тым, што дадзены метадычны дапаможнік Міністэрства адукацыі не распрацоўвала і не зацвярджала, ён не з'яўляецца нарматыўным дакументам і не адлюстроўвае пазіцыю Міністэрства.

Дадзены дапаможнік распрацаваны ў Мінскім дзяржаўным педагагічным універсітэце пры ўдзеле аддзела адукацыі, спорту і турызму Капыльскага райвыканкама як навуковая праца. Аб гэтай «навуковай» дзейнасці не апавяшчаліся вышэйстаячыя арганізацыі.

Міністэрства адукацыі афіцыйна запэўнівае, што падобныя метадычныя дапаможнікі не будуць укараняцца ў нашай краіне, а выхаваўчы працэс будзе ўлічваць духоўна-маральныя традыцыі беларускага народа.   

Church.by