Пошук

У Віцебску праходзяць юбілейныя мерапрыемствы да 220-годдзя заснавання Віцебскай духоўнай семінарыі

03 чэрвеня 2026

У Віцебскай духоўнай семінарыі ў рамках юбілейных мерапрыемстваў прайшла Міжнародная навукова-практычная канферэнцыя «Багаслоўе. Гісторыя. Адукацыя (да 220-годдзя заснавання Віцебскай (Беларускай) духоўнай семінарыі)».

Прывітальнае слова рэктара Віцебскай духоўнай семінарыі архіепіскапа Віцебскага і Аршанскага Дзімітрыя абвясціў епіскап Друцкі Яўсевій, вікарый Віцебскай епархіі.

Пленарнае пасяджэнне прадоўжылася дакладам першага прарэктара навучальнай установы протаіерэя Канстанціна Ізафатава аб сучасным становішчы Віцебскай духоўнай семінарыі.

Пасля гэтага адбылася прэзентацыя юбілейных выданняў, прысвечаных гісторыі духоўнай адукацыі на Віцебшчыне і навамучанікам з ліку тых, хто навучаўся ў Віцебскай духоўнай семінарыі.

Рэктар Мінскай духоўнай акадэміі архімандрыт Афанасій (Сакалоў) выступіў з дакладам аб прыходах горада Віцебска ў 1832 годзе, напярэдадні адраджэння Полацка-Віцебскай епархіі.

Таксама на пленарным пасяджэнні выступілі дацэнт кафедры тэорыі і методыкі фізічнай культуры і спартыўнай медыцыны Віцебскага дзяржаўнага ўніверсітэта імя П. М. Машэрава, кандыдат педагагічных навук Наталля Мініна; прафесар кафедры псіхалогіі Віцебскага дзяржаўнага ўніверсітэта імя П. М. Машэрава, загадчык кафедры царкоўнай гісторыі Віцебскай духоўнай семінарыі, доктар гістарычных навук, прафесар Веніямін Космач; памочнік прарэктара па выхаваўчай рабоце Маскоўскай духоўнай акадэміі, навуковы супрацоўнік Пярэрвінскай духоўнай семінарыі, кандыдат багаслоўя, дацэнт Міхаіл Каўшоў.

Далейшая праца канферэнцыі працягнулася ў секцыйным фармаце.

Таксама ў Віцебскім абласным краязнаўчым музеі адбылося адкрыццё выставы «Летапіс даўжынёю ў 220 гадоў», прымеркаванай да 220-годдзя заснавання Віцебскай духоўнай семінарыі.

Прысутных віталі епіскап Друцкі Яўсевій, вікарый Віцебскай епархіі, і першы прарэктар Віцебскай духоўнай семінарыі протаіерэй Канстанцін Ізафатаў.

З віншавальнай прамовай выступілі галоўны спецыяліст упраўлення культуры Віцебскага аблвыканкама Дзяніс Юрчак і дырэктар Віцебскага абласнога краязнаўчага музея Таццяна Старынская.

У рамках святкавання 220-годдзя заснавання і 15-годдзя адраджэння Віцебскай духоўнай семінарыі ў Свята-Успенскім кафедральным саборы горада Віцебска выступіў Арэнбургскі муніцыпальны камерны хор з праграмай a cappella.

У праграму ўвайшлі спевы Р. Шчадрына, С. Рахманінава, П. Часнакова і іншых кампазітараў. Мастацкі кіраўнік і дырыжор хору — заслужаны дзеяч мастацтваў Расіі, прафесар Вольга Серабрыйская.

* * *

Віцебская духоўная семінарыя была заснавана ў 1806 годзе паводле ўказа імператара Аляксандра I і першапачаткова называлася Беларускай духоўнай семінарыяй. Навучальная ўстанова размяшчалася ў Полацку, у 1840-м была перайменавана ў Полацкую духоўную семінарыю, у 1856-м пераехала ў Віцебск, а ў 1872 годзе атрымала назву Віцебскай духоўнай семінарыі.

Апошні дарэвалюцыйны выпуск адбыўся ў 1918 годзе. Найноўшая гісторыя духоўнай школы пачалася з адраджэння духоўнага вучылішча ў 1997 годзе, а ў 2011-м рашэннем Свяшчэннага Сінода яно было пераўтворана ў Віцебскую духоўную семінарыю.

Сёння ў Віцебскай духоўнай семінарыі навучаецца каля 300 чалавек. Сярод яе выпускнікоў — пяць кананізаваных святых і чатыры архіерэя.

Фота: Дзяніс Васілец, Крысціна Дагодзька

vitprav.by / Church.by

Чытайце нас у мэсэнджэрах Telegram і Viber, 

сацсетках Instagram, ВКонтакте, 

Facebook і Одноклассники,

глядзіце ў YouTube і TikTok